БАРОИ БАЧАГОН

15 апрел - Зодрӯзи Садриддин АЙНӢ

ТАҚВИМИ РӮЗГОРИ САДРИДДИН АЙНӢ

Биёед эй рафиқон, дарс хонем,

Ба бекорию нодонӣ намонем.

Ба олам ҳар касе бекор гардад,

Ба чашми аҳли олам хор гардад…

·     Сардафтари адабиёти навини тоҷик, нависанда, шоир, муҳаққиқи адабиётшинос Садриддин Айнӣ 15 апрели соли 1878 дар деҳаи Соктареи ноҳияи Ғиждувони вилояти Бухоро ба дунё омадааст.

·     Орзую ҳаваси илму шеър Айниро дар 12-солагӣ ба Бухоро меорад ва адиб дар давоми 16 сол дар мадрасаҳои мири Араб, Олимҷон, Бадалбек, Ҳоҷӣ Зоҳид ва Кӯкалтоши Бухоро таҳсил карда, соли 1908 онро хатм мекунад.

·     Айнӣ девонҳои Ҳофизи Шерозӣ, Мирзо Абдулқодири Бедил, Алишер Навоӣ, Фузулиро  мутолиа мекард.

·     Аз соли 1896 Садриддин бо тахаллуси адабии «Айнӣ» ба навиштани шеърҳои мустақилона cар кардааст.

·     Айнӣ муаллифи асарҳои «Мактаби кӯҳна», «Ҷаллодони Бухоро» (1920), повести «Одина» (1924), «Марги судхӯр» (1937), «Ятим»(1940), романи «Дохунда» ( 1930), «Ғуломон» (1934), «Ёддоштҳо» (дар 4 китоб, 1950) ва як қатор асарҳои илмӣ мебошад.

·     Дар ҳикояҳо, шеърҳои бачагонаи Айнӣ мавзӯъҳои ватандӯстӣ, илмомӯзӣ, меҳру муҳаббат, дӯстиву рафоқат, накӯкорӣ ва ғайра тарғиб шудааст.

·     Устод Айни таърихдон, забоншинос, луғатдон, мураббӣ ва омӯзгор, марди пуркору меҳнатдӯст буд.

·     Нависандаи маъруф Садриддин Айнӣ 15 июли соли 1954 дар Душанбе вафот мекунад.

ФАРИДУН.

САВОЛУ ҶАВОБ

- Хонаи нағзи дунё кадом аст?

- Мактаб аст.

- Бачагони нағз киҳоянд?

- Бачагони мактабанд.

- Аз бачагони мактаб кадомашон нағзтаранд?

- Бачагоне, ки ҳаргиз аз мактаб намемонанд.

- Аз инҳо кадомашон хубтаранд?

- Бачагоне, ки ҳамеша аз паи хондан ҳастанд ва барои аълохонӣ ҳаракат мекунанд.

- Аз инҳо кадомашон беҳтаранд?

- Қаламу коғази ҳамсинфонашро берухсат намегирифтагӣ, ба шарики қаламу коғаз надоштааш, қаламу коғази зиёдатии худро медодагӣ, хоксору ҳалим, ширингуфтору хушрафтор будагӣ бачаҳо.

Аз «Таҳзиб-ус-сибён»-и Садриддин АЙНӢ.