НАЗМ

‎Алиҷони Сарбанди‎ в 

КУҶО РАФТӢ?

Шикаста аҳду паймонам куҷо рафтӣ?
Надида ашки чашмонам куҷо рафтӣ?
Дилам равшан зи чашми пуршарорат буд,
Ту, эй моҳи шабистонам, куҷо рафтӣ?

Дилам печида менолад зи танҳоӣ,
Сарам гум карда ақлашро зи савдоӣ,
Ду чашмам хира шуд аз дарди раҳпоӣ,
Ту, эй дорую дармонам, куҷо рафтӣ?

Намебинам дигар ман он гули рӯят,
Намепечад дигар бар гарданам мӯят,
Намеорад дигар боди сабо бӯят,
Ту, эй руҳу дилу ҷонам, куҷо рафтӣ?

Туро меҷӯям акнун аз дили дарё,
Туро меҷӯям аз домони ҳар саҳро,
Туро меҷӯям аз ҳар гӯшаи дунё,
Ту, эй уммеду армонам, куҷо рафти?

Адиба Хуҷанди

Як ду вожа баҳри тафсири шитоб овардаӣ..
Ақлро то ҷангали зумрад ва дашти атрҳо,
Дур аз андӯҳи талхи хурду хоб овардаӣ.
Нест охир офият дар хонаи оинаҳо,
Бебақоии ғаразро чун ҷавоб овардаӣ.
Боварии барги сабзи зери поро ҳолиё,
З-он ҳама савгандҳои беҳисоб овардаӣ.
Номаи тақдирро дар оташи мавъуди ӯ,
Сӯхтию хоки мо дар изтироб овардаӣ.
Ин ду се рӯзе, ки дар қонуни ҷангал зистем,
Моҷаро дар моварои ин китоб овардаӣ.
Мӯбадӣ, биншастаӣ, хомуш андар ҳошия,
Ханда бар бозору савдои ҳубоб овардаӣ.
Анҷуман дар соязори ғафлати ҳирс асту оз,
Ҷамъу тақсими ҳама маҳви сароб овардаӣ.
Ин ҳама такрору нотакрор дар сарводаҳо,
Эй, Адиба як гуле аз дасти об овардаӣ...

Камол Насрулло

 Шеър гуфтан – зистан

Шеър гуфтан бӯса киштан дар баёзи зиндагист,

Ояи некӣ сурудан дар намози зиндагист.

То бирӯяд лолагул дар ҳотаи пиндорҳо,

Ҳулбаву райҳон дамад дар вотаи пиндорҳо.

Гул бирӯяд дар лабу дил бо нидои “Ишқ!Ишқ!”,

Дил шавад як пораи гил бо нидои “Ишқ! Ишқ!”.

Шеър гуфтан – зистан дар ҳар нафас, дар ҳар ҳавас,

Як абад бунёд кардан аз ҳазору як абас.