НАЗМ

Муниси ЗИКРУЛЛОҲ

ВАТАН

Тахти каёну тоҷи зари ман Ватан , Ватан,
Хуршедӣ, ҳар куҷо ба сари ман, Ватан, Ватан.
Роҳи сафар тариқи ҷавонмардию ҳунар,
Саъдӣ бигуфт, дил ба бари ман Ватан, Ватан.
Мо дар сафар ба қадри Ватан беш мерасем,
Ному насаб, ғуруру фари ман Ватан, Ватан.
Мо дар амал ба ишқи Ватан ҷону дил диҳем,
Маънои чашми ман - назари ман Ватан, Ватан.
Аз ҳар куҷо паём фиристам ба офтоб,
Пазмони ту дилу басари ман, Ватан, Ватан.
Дар ҳар куҷо чу шохаи аз решааш ҷудо,
Ҳоли ман аст, эй шаҷари ман, Ватан, Ватан.
Савганд, номи туст бароям чу зиндагӣ,
Бар муддао туӣ зафари ман Ватан, Ватан.
***
Ватан, эй ормону орзуи бардавоми ман,
Туӣ оғозу анҷоми ҳаёту нангу номи ман.
Туӣ дирӯзи ман, имрӯзи ман, фардои пурнурам,
Барои туст ин ғурбат, ҳама кору мароми ман.
Куҷоҳое, ки ман рафтам, туро ҳамроҳи худ бурдам,
Ватан, эй обрӯи ман, туӣ ҳам эҳтироми ман.
Чароғи рӯз хуршед асту шамъи шом маҳтоб аст,
Ту шамси беғуруби дил барои субҳу шоми ман.
Ман аз оромии субҳи сафоят шукр мегӯям,
Хати нури ба роҳи ман, давоми ман, тамоми ман.
Баҳору баҳмани умрам, замину осмони ман,
Ватан, эй офтоби бахт андар рӯи боми ман!